Hüt isch bi mir wiedär mal Wöschtag das heisst, ich han vo gescht Abig am 7ni, bis hüt Abig am 7ni dWöschchuchi 1 zu minärä Värfüägig. Wänni Früäschicht han wiä hüt, wird das ganzä rächt äng und ohni min Schatz würi das glaub gar nöd schaffä, dassi i därä Ziit alläs chan wäschä, tröchnä und dänn scho wiedär subär ha für dä nächscht.
Mär sind ebä geschtär ersch am 8i am Abig dihei gsi und dänn hani mal no ä 60er-Wösch schwingä lah. Für dä Tumbler häts vor äm 10ni natürli nüm glangät, drum hanis ufghängkt übär dNacht.
Hüt morgä bini extra am halbi sächsi ufgstandä, willi gmeint han, ich chöni dänn grad nomal ä 60er inä tuä und äs wür langä, dass sie dä Michael am 7ni – churz bevor är dänn au muäss gah – no chan in Tumbler tuä. Tja, da hani abär ei Übärlegig zwenig gmacht: und zwar, dass mär ja ersch am 6i wiedär döf afangä wäschä 🙁 Tja, dänn bini halt zersch go duschä und han Zmorgä g’ässä und dänn häts halt nur für ä 40er glangät. So hät sie dä Michael öppä am 7ni no chönä usänäh und in Tumbler schmeissä.
Will ich dänn am Abig, grad nach äm schaffä, möcht is Training gah, isch dä är so nett und luägt, dass är nach äm schaffä chan zu mir hei, dWösch usä und ufä näh und dWöschchuchi wiedär subär chan abgäh.
Ich bin scho mega froh, dass ich ihn han 🙂 *strahl*
