Halli Hallo 🙂
Sooo, ez mäldi mi au wiedär mal mit chli Text und pass nöd nur dä Ticker ah 😉
Jo, was sölli au värzellä. Äs stocked halt chli im Momänt, äs blibt immär so um di 69kg, leider. Abär ja, bi au chli sälbär Tschuld. Letscht Wuchä hani übärhaupt kä Tagebuäch gfüärt. Erschtäns, willi kä Luscht gha han, wills mär z’müähsam xi isch, willi am Mittag eich immär im Resti xi bin, Stress etc Zweitens hät am Chlaustag irgändwiä ä Frässattacke agfangä :-/ Im Büro häts än Chlaussack gäh und bis am Fritig sind deht praktisch alli Nüssli, Schoggitaler etc scho g’ässä xi :-/ Ha eifach alläs i mich inägstopft 🙁 Wieso ich das gmacht han? Ja, guäti Frag. Villich will ich eich gnuäg (s’glich wiä im alte Job) zum Zmorgä g’ässä han, abär am 9ni odär 10ni scho wiedär Hungär gha han, ä Frucht nüt bracht hät und süsch nüt umä xi wär, wo mis Magächnurrä gstoppt hett. Abär öb das än Entschuldigung isch…
Am Samschtig bini abgseh vo därä 1h Fitness am Vormittag dä ganz Tag meh odär weniger fuul dihei umäghockt und us Langwili odär, willi eifach öppis z’bissä han „müssä“ ha, hani eifach alläs i mich inägstopft, wo gad umä xi isch: Guätzli, Nüssli, Brot, Jogurt, Chäs, Fleisch, etc etc etc :'(
Am Sunntig bini uf di 11 wiedär is Fitness mich 1h go sportlich betätigä und woni am halbi zwei dihei xi bin, hani scho dänkt, ez bini eh wiedär dä ganz Nomitag/Abig älei und cha mi nur mit fuul umäliggä und ässä beschäftigä… zum Glück hät mi dänn sMami gad gfrögt, öbi nöd no uf Winti an Wiähnachtsmärt chämi. Da bini dänn nur 10min dihei xi und dänn hani wiedär müssä uf dä Zug. Will min Buch knurrt hät, hani eifach mal ä schiibä brot no g’ässä, dass äs für dä Momänt glangät hät. Am Wiähnachtsmärt hani all dä feinä Sachä, wiä Guätzli, Schoggifrücht, Magäbrot etc chönä widärstah und für dä Hunger hani ä Suppä gno #yammie# Guät, äs isch dänn zwar mit Rahm xi, wahrschinli nöd wenig, abär äs isch fein xi und nüt schwärs 🙂
Mäntig und Zischtig hani dänn gluägt, dassi mi wiedär in Griff bechum und’s am Abig uf dä Waag nöd z’vill azeigt. Sind zum Glück nur 100g meh xi, abär wänni mi au diä Wuchä a dPünkt ghaltä und Tagebuäch gschribä hett, dänn hettäds guät 500g WENIGÄR chönä sii.
Sit am Mittwuch bini ez wiedär am Pünkt ufschribä und au ihaltä! 🙂 Mit Sport gsehts diä Wuchä leidär nöd so guät us, uf äm Programm staht im Momänt andärs, dänn dWiähnachtä staht ja vor dä Tür. Abär ich luäg, dassi mi halt im Alltag vill bewegä tuä. Hüt zAbig gahts wiedär mal uf Amsterdam und da freu mi riesig druf, au wänns schwierig wird. Deht gits doch di feinä Poffertjes, Pannekoeken etc, abär für dä Gluscht langäd ja äs chlisäs Chüssäli Poffertjes 🙂 Am Sunntig morgä simmär dänn zrugg und a däm Tag wird uf jedä Fall Sport gmacht! Bi grosser Hoffnig, dass dWaag am zischtig weniger als letscht Mal azeigt, villich ja wiedär mal undär 69… und mal luägä, wiä das mit äm Ässä und dä Bewegig übär Wiähnacht/Neujahr gaht, dänn s’nächschtä Träffä isch ersch am 7. Januar wiedär… Ich gib mis Bescht!
