So, ich muss ez eifach mal öppis loswärdä.
Thema Ärnährig, wiä wohl alli vo eu festgstellt händ, han ich ja i dä letschtä 1.5Jahr ca 10kg zuägno und das gfallt mär immär wenigär, wiä ich witär und witär wäg vo mim Wohlfühlgwicht chumä.
Ich han immär wiedär värsuächt öppis z’ändärä: jedi Wuchä 1h go schwümä, wenigär bis kei Süässäs ässä, chlinäri Portion odär wenigär z’ässä, mich süsch probiärt meh z’bewegä… abär gwürkt odär gfruchtät hät leidär nüt würkli.
Ez abär, sit ca Mitti Mai hani das chli konkretär i dHand gno. Ich gang, odär ich bin bis vor 2Wuchä, jedi Wuchä 3x 50-60min is Usduur-Fitness gangä. Das Training hani extra uf mich abstimmä lah, dass ich am beschtä Fett värbrännä. Leidär hani abär am Körper nüt gseh, wo wenigär wordä isch, ha sGfühl ehär fasch im Gegäteil… :-/
Ich han ja scho oft ghört „Mär sött villich au dÄrnährig apassä.“ Das isch mär ja au klar, hani au värsuächt: han sälbär nur no Vollkornsachä (wiä Brot, Teigwarä, Teig) etc g’ässä, vill wenigär Süässäs (früänär hani jedä Tag öppis MÜÄSSÄ ha), etc…
Abär irgändwiä hät halt au das nüt würkli bracht und ich han dänkt, ich chan das nur mit Untärstützig und us däm Grund hani mi entschlossä än Ärnähigsberatirin uf z’suäch. Da hani dänn au nöd eifach eini wellä. Mir isch wichtig xi, dass Sie mir nüt värbütät und dass ich alli Läbäsmittäl i jedäm Ladä chan poschtä, also nöd ä spezielli Liniä (Weightwatchers) muss ässä. Mit mim Schatz zämä hani dänn ä sympatisch asprächändi Sitä vonärä Ärnährigsberaterin zmizt i dä Stadt Züri gfundä. Ich han ihrä dänn grad mal gschribä, dass ich interessiärt wär, aber Aforderigä au a si han… =) Sie hät mär dänn ziemli schnäll zrugg gschribä, dass Sie nüt värbüti, sondern dass mär alläs döf ässä – im gwüssä mass. *strahl*
So, ha grad kä Ziit meh zum witär schribä, münd eu no chli geduldä, wiä’s witärgangä isch.
