Uf di zweit Sitzig hi, hani wiä scho vorhär gschribä, äs Ärnährigsprotokoll gmacht und dFrau Heuberger isch meh als z’friedä xi dämit *stolzbin* Sie hät globt, wiä gnau und usfüährlich, dass äs seg und dämit chöni Sie scho guät schaffä. Ha ebä au vo praktisch jedäm Läbäsmittäl dihei dNährwärttabällä abgschribä. Sie rächnät mir ez nämli vo 1-2Tag mal us, wiä vill Kaloriä isch deht zu mir gno han und wiä vill ich eich nur brüchti.
S’Thema für diä Sitzig sind dChohlähydrat xi und ich ha i mim Protokoll mal alli müssä markiärä, da bini dänn grad chli gschockt xi, wiä vill das übär dä Tag värteilt wordä isch. Äs isch scho so, dass mär i jedärä Hauptmahlziit sött Chohlähydrat (z.B Brot, Teigwarä, Riis etc) sött zuä sich näh, abär dPortionä sind sehr entscheidänd. Und diä sind bi mir definitiv z’gross. Dä Richtwärt vo dänä Chohlähydrat pro Tag lit nämli bi 250g und a eim Tag hani älei zum Znacht 250g Gnocchi g’ässä plus no zum Zmorgä äs Müäsli odär äs Brot und au zum Zmittag Riis odär Teigwarä… :-/
Drum sini mini Huusufgabä für di nächschtä drü Wuchä – ich gseh dFrau Heuberger leidär ersch dänn wiedär – äs Protokoll übär mini zwei Ziil z’füärä. Und zwar lutäd mini zwei Ziil wiä folgt: Ich möcht uf dMängi vo dä Chohlähydrat-Ateil achtä und glichzitig värmindärä. Ich möcht meh Abwächslig i mini Chohlähydrat-Zuäfuhr bringä. Also au mal wiedär Polänta odär Ebly, nöd nur Riis, Teigwarä, Brot und Müäsli 😉
Jo, mal luägä, wiä das chunt. Ich brichtä hoffäntli regelmässig drübär. Villich gits au äs Ärnährigsprotokoll da inä, wännär interessiärt sind… ?
…ich bewundere dini offeheit, grad bi dem thema wo frau ja angeblich bsunders z’herze goht. Good luck!